Thursday, October 22, 2009

بہار ...

پھر لہو رنگ ہوئی ہے میرے گلشن کی بہار 
آگ برسی  ہے پھر اس باغ  کی  سیرابی کو 

برق اتری ہے ہر اک بام سے، ہرغنچے کا لب
پھر  سے  دہرانے  لگا   قصّہ  بیتابی  کو

لالہ  و  گل  کا  یہ رنگ ،  نوحہ  سرا  یہ  بلبل 
یہ  سماں  اہل  چمن  کے  لئے  نیا  تو  نہیں 

لیکن  اس درد  کا  یوں  حد سے گزرتے جانا 
 روز  اک  سروِ  قد   افروز  کا  گرتے  جانا

یہ تو ممکن ہے کہ اس درد سے  بے حس کردے
لیکن  اے اہلِ  چمن ،  بے حسی  دوا   تو   نہیں

اب کے  جس  طو ر سے  یہ  خونیں گھٹا اٹھی ہے 
یہ  تو  ممکن  ہے ذرا  دیر   سیاہی  ہو  گی

پر  نہ  گھبراؤ ، بہت جلد اسی   باغ  سے  ہی
لاکھوں  قندیلیں  لئے،  اہل  چمن   ابھریں  گے

بلبلیں پھر سے سنائیں گی وہی پیار کے گیت
دامنِ شب پہ ستاروں کے گہر بکھریں گے

اور ان سب کی ضیا، درد کے ماروں کے لئے 
ایک  بے  داغ  سویرے  کی   گواہی   ہو گی 

 

No comments:

Post a Comment